Imibiko ephume kuphephandaba leNewsday ngoLwesihlanu iveza ukungezwani phakathi kukamphathintambo obona ngezemigodi uMnumzana Obert Mpofu lesiphathamandla seCanadile Mining uMnumzana Lovemore Kurotwi.
INewsday ibika ukuthi emhlanganweni phakathi kukamongameli Robert Mugabe, uMpofu loKurotwi, uKurotwi waveza sobala ukuthi uMpofu wacela imali yesifumbathiso yokuthi asekele isicelo seCore mining sokusebenzelana lenkampani yeZimbabwe Mining Development Corporation- ZMDC kudaba lokwemba amadayimana akoMarange.
Uzulu jikelele eZimbabwe uthi imibiko le iveza sobala ukuthi kulokungathembeki ekwenjiweni kwamadayimana akoChiadzwa.
Ingxabangxoza phakathi kuka mpofu lokurotwi ilandela ukubotshwa kuka Kurotwi lezinye iziphathamandla ze ZMDC ngeviki edluleyo. Ezinye iziphathamandla ze ZMDC loKurotwi zikhululwe kuyonale iviki.
UBrenda Moyo weStudio 7 ukhulume lengcwethi ecubungula ezombusazwe uMnumzana Bekithemba Mhlanga othi imfihlo esiphuma emasakeni le iveza ukulwisana phakathi kwenhlangothi ezithize kubandla leZANU PF.
