Ikomiti yedale leSenate ebona ngelungelo loluntu ithi iphakathi kohlelo lokuhlola amajele elizweni njalo isifumene ukuthi umumo osemajele eKhami leBinga usungcono nxa uqathaniswa lesimo ayeyiso sona ngomnyaka ka 2008.
Umgcinisihlalo walikomiti uMnu. Misheck Marava utshele iStudio 7 ukuthi lanxa umumo wemajele usungcono, uhlupho lokuswelakala kokudla okweneleyo lempahla zokugqoka lokhu lungakaphelisisi njalo izibotshwa eBinga lokhu zingatholi inyama ekudleni kwazo.
UMarava wengeze wathi abesifazana abalengane ezincane yibo ababhekane lodubo ngoba akulamthetho olondoloza amalungelo azo njalo lokuthi kumele ziphiwe ukudla okunjani zisemajele.
Uhulumende uthi uzakwakha ijele labesifazana eMarondela lapho abakhangelele ukuthi abantwana bazagcinakala kuhle khona.
UMnu. Lizwe Jamela, igqwetha, utshele uSithandekile Mhlanga weStudio 7 ukuthi lanxa engakaze ahlolisise ngokwenzakala emajele, labo abakhululwa khona bathi sokulomahluko.