Abalwela ilungelo loluntu kanye lamabandla ezombusazwe ezigabeni zeMaNdebeleni leNkabazwe bathi lokhu bezimisele ukuvimba iqembu lenguqu ele North Korea ukuthi lidlale ko Bulawayo ngoba livela elizweni okuyilo elancedisa uMongameli Robert Mugabe ukufundisa ibutho le Fifth Brigade eletheswa umlandu wokubulala abantu beMaNdebeleni lenkabazwe ngesikhathi sempi ye Gukurahundi.
Umpathintambo wezokwethekelelwa kwelizwe uMnu. Walter Mzembi, ubikwa esithi iqembu leli kalisalugxobi ko Bulawayo, kodwa ngolweSine ulandule limbiko kulumsakazo esithi uhulumende kakahlali phansi ukuthi abeke isinqumo esipheleleyo ngaloludaba.
UMnu.Edwin Ndlovu, isikhulumi secele le MDC elikhokhelwa nguMnu. Arthur Mutambara kweleMaNdebeleni, utshele uSithandekile Mhlanga we Studio 7 ukuthi ibandla lakhe ngelinye labakhankasela ukuvinjwa kweqembu le North Korea njalo lokhu beqinisa ukuthi lingasondeli koBulawayo.