Iqula likaMongameli Jacob Zuma weleSouth Africa lifike eZimbabwe ngoMvulo ukuzokhulumisana labamela iZanu PF leMDC kunkulumo ngaphambilini kohambo lukaZuma eHarare ngoLwesibili.
Isikhulumeli sikaZuma uMnu Vincent Magwenya utshele iStudio 7 ukuthi uMongameli Zuma ufika ngoLwesibili eHarare njalo uzasuka ngoLwesine ngemva kokukhulumisana loMongameli Mugabe, uMnu Morgan Tsvangirai loMnu Arthur Mutambara ngokuhluphayo kuhulumende womanyano.
Omunye okuqula likaMongameli Zuma elifike eHarare ngoMvulo, uNkosazana Lindiwe Zulu utshele lumsakazo ukuthi bahlangane ngoMvulo ntambama labameli beMDC labeZanu PF kunkulumo.
Wengeze wathi uZuma ufuna okuhluphayo phakathi kweZanu PF leMDC kulungisiswe ngokuphangisa, khona okugoqela udaba lukasibalukhulu webhanga elikhulu lelizwe uMnu Gideon Gono legqwetha elikhulu likahulumende uMnu Johannes Tomana. Ibandla leMDC lithi lifuna ababili laba basuswe ezikhundleni, okuyinto ephikiswa yiZanu PF.
Ingcwethi ecubungula ezombusazwe uMnu Samukele Hadebe utshele uNtungamili Nkomo weStudio 7 ukuthi uZuma kumele ebambe ngamandla iZanu PF ukuthi igcwalise isivumelwano seGPA.
