Iqula likaMongameli Jacob Zuma weleSouth Africa lihlangane labameli beZanu PF leMDC eHarare ngoMvulo kukhulunyiswana ngokudonselana okulokhe kukhona phezu kokugcwaliswa kwesivumelwano seGlobal Political Agreement.
Iqula likaZuma leli lilamalunga amathathu abalisa uMnu Mac Maharaj, uMnu Charles Ngqakula loNkosazana Lindiwe Zulu.
Abathathu laba bafike ekuseni ngoMvulo eHarare bahlangana labameli bamabandla womathathu emini. Abazi ngokwenzakalayo bathi iqula likaZuma leli lizahlangana njalo loMongameli Mugabe, uMnu Morgan Tsvangirai loMnu Arthur Mutambara.
Abamela iZanu PF leMDC kunkulumo bebekhangelelwe ukuqala ukukhulumisana bebodwa ngemva kokuhlangana lequla likaZuma ntambama. Ingcwethi ecubungula ezombusazwe uMnu Samukele Hadebe utshele uNtungamili Nkomo ukuthi ubona iqula likaZuma liphumelela.
