Iqula likamongameli Jacob Zuma weleSouth Africa lihlangane labamela amacele womabili eMDC labeZanu PF eHarare ngoLwesine belungiselela umhlangano weSadc ozahlaziya udaba lweZimbabwe ngeviki ezayo.
Umhlangano lo uzaqhutshelwa kweleSouth Africa. Abangene emhlanganweni wangoLwesine lequla likaZuma batshele iStudio 7 ukuba bebelungiselela umhlangano weSadc ozayo bekhangela abakukhulume emhlanganweni abawenzele eCape Town kumaviki ambalwa edluleyo.
Udaba olukhanya luhlupha kakhulu ngolokuguqulwa kwendlela abezomvikela abasebenza ngayo njengokukhalaza kweMDC. Kodwa abeZanu PF bayakwala lokhu.
Lanxa iZanu PF ibike yathi ayisoze ib’saphatheka ekulotshweni komhlahlandlela wokhetho, omela lelibandla kunkulumo uMnu Patrick Chinamasa uthi ngolunye lwezinto abakhulume ngazo ngoLwesine.
UMongameli Robert Mugabe yena ekhuluma kuliviki uthe nxa ukhetho lungenziwanga lonyaka ufuna lwenziwe ekuqaleni komnyaka ozayo. Sikhulume lomela iMDC kaMnu Welshman Ncube kunkulumo uMnu Moses Mzila Ndlovu ngaloludaba.
