Inkokheli kahulumende womanyano ithi isizilungiselele umhlangano oqoqwe ngumanyano we SADC Troika kusasa e Gaborone kwele Botswana. Umhlangano lo wenziwa nje, kuphambukwa emkhosini wokuvula isakhiwo esitsha somanyano wamazwe eSADC, ngenjongo yokuhlaziya ukuthi uhulumende womanyano kweleZimbabwe uqhubeka njani.
Iziphathamandla ze SADC Troika, ezibalisa ele South Africa, Zambia, leZimbabwe zithi kuzahlafunwa okunengi okugoqela ukuthi eleZimbabwe selilungele ukhetho na kumbe hatshi, kanye lokhukhonona kwamanye amabandla ukuthi uMongameli Robert Mugabe uzenzela santando kuhulumende womanyano.
UMnu. Welshman Ncube, unobhala jikelele wecele le MDC elikhokhelwa nguMnu. Arthur Mutambara, ozabe ekulo umhlangano, utshele uSithandekile Mhlanga we Studio 7 ukuthi ibandla lakhe lisola icele le MDC elikhokhelwa nguMnu. Morgan Tsvangirai, kanye le bandla le ZANU PF ngokudonsela emuva uhulumende womanyano.