Izizalwane zeZimbabwe zile mbono etshiyeneyo ngesinqumo, esithethwe ngumanyano we European Union, sokwengezelela izijeziso ezetheswa ezinye iziphathamandla zebandla le ZANU PF, lokwethulwa kwezinye. Abanye bayasola besithi ngabe zikhutshwa zonke, abanye njalo bathi isinqumo se EU silungile.
Ibandla le ZANU PF lithi ngabe izijeziso lezi ziyakhutshwa ngoba kuyizo ezibangela ukubhidlika komnotho welizwe.
Abakhutshwe kuluhlu lwezijeziso ngoNkosikazi beziphathamandla zebandla le ZANU PF ababalisa amakhosikazi abalandelayo; okaMnu. Augustine Chihuri, oka Mnu. Gideon Gono, oka Mnu. George Charamba, kanye loka Mnu. Joseph Made. Abakhutshiweyo kulolu luhlu bagoqela uMnu. Fortune Charumbira, uMnu. Sobusa Gula-Ndebele, uNkosikazi Victoria Chitepo, kanye lo loMnu. Chris Kuruneri.
Ukuze sizwe okunengi ngaloludaba uSithandekile Mhlanga we Studio 7 uxoxe loMnu. Felix Magalela Mafa, isiphathamandla secele le MDC elikhokhelwa nguMnu. Morgan Tsvangirai endawonye loMnu. Qhubani Moyo, isiphathamandla secele le MDC elikhokhelwa nguMnu. Welshman Ncube bona abalembono etshiyeneyo ngaloludaba.