Ibandla le ZANU PF seligcizelele ukuthi uhlelo lokulotshwa kutsha kwesisekelo sombuso esitsha luphutshiswe ngokutshetsha ukwenzela ukuthi kube lokhetho umnyaka ungakapheli.
UMnu. Simon-Khaya Moyo, umgcinisihlalo walelibandla ubikwa esithi icele le MDC elikhokhelwa nguMnu. Morgan Tsvangirai yilo elidonsela uhlelo lolu emuva.
UKhaya-Moyo wengezelele wathi i MDC ayilanhlelo ezicacileyo ezokuthuthukisa abantu elizweni njengebandla lakhe, ngaphandle kokuthi ifuna ukususa uMongameli Robert Mugabe esihlalweni.
Ugcizelele ngokuthi iMDC isebenzisa imisakazo engaphandle kwelizwe ukukhuluma kubi ngeleZimbabwe.
UMnu. Edward Mkhosi omunye wabagcinisihlalo bekhomidi eyabunjwa lidale lephalamende ukuze iqondise ukulotshwa kutsha kwesisekelo sombuso utshele uSithandekile Mhlanga ukuthi kungayiwa kukhetho lwe Referendum umnyaka ungakapheli kodwa kunengi okumele kwenziwe ukuthi ilizwe lilungele ukhetho.