Uhulumende we South Africa uthi ukhulumisana lamabhanga akulelolizwe ngodaba lokuthi izizalwane zeZimbabwe ezizaphiwa incwadi ezintsha zokuhlala kulelolizwe ngokusemthethweni zingabhekani lodubo nxa ziboleka imali kuwo zisebenzisa incwadi ze South Africa.
Lokhu kuphume emhlanganweni oqhutshwe ngolweSibili ntambama e Pretoria yinhlanganiso yeStakeholders Forum lomphathintambo obona ngokwenzakala elizweni uNkosikazi Nkosazana Dlamini –Zuma.
UMnu. Ngqabutho Dube, omela icele le MDC elikhokhelwa nguMnu. Arthur Mutambara kulinhlanganiso, utshele uSithandekile Mhlanga we Studio 7 ukuthi okusele yikuthi izizalwane zeZimbabwe zivunyelwe ukusebenza ngokusemthethweni kumankampani esecurity lanxa seziphiwe incwadi ezintsha ngoba lolu lugatsha olubekelwe izizalwane ze South Africa kuphela.