amalinks wokungena

Breaking News

ISupreme Court Iqala Ukuhluza Udaba LukaMnu Paul Siwela


Umthethwandaba waphezulu oweSupreme Courth uqalise ngoLwesibili ukuhluza isicelo sokukhululwa kukaMnu Paul Siwela, owetheswa icala lokuzama ukugenqula uhulumende.

USiwela, olilunga leMthwakazi Liberation Front, okuyinhlanganiso ekhankasela uzibuse wesizwe sikaMthwakazi, ubotshwe mhlaka 3 ngoMbimbitho labanye bakhe abathi uMnu John Gazi loCharles Thomas besetheswa icala elifanayo.

UThomas loGazi bakhululwe ngenyanga edluleyo ngemva kokuhlawula imali yesibambiso. USiwela yena selenyanga ezimbili evalelwe eKhami lanxa eke wavunyelwa lidale leHigh Court ukuthi ahlawule imali yesibambiso ukuze akhululwe.

Isinqumo lesi siphikiswe ngabatshutshisi bakahulumende, okuyinto ebangele ukuba aqhubeke evalelwe.

Ngemva kokwamukela imbono yamagqwetha amela uSiwela lamela uhulumende, umahluli weSupreme Court uGodfrey Chidyausiku ulaye amagqwetha kaSiwela ukuba aze lencwadi elotshwe yasayinwa nguSiwela ethembisa ukuthi engakhululwa kasoze adale icala elifanayo.

Amagqwetha amela uhulumende athi uSiwela nguMuntu olomkhuba wokutshotshozela udlakela, esithi alobufakazi ngalokhu ngoba eke wetheswa njalo icala lokuzama ukugenqula uhulumende ngomnyaka ka2004.

Amagqwetha kaSiwela ayakulandula lokhu. Athi isixwayiso sikaChidyausiku sokuthi aze lengcwadi evela kuSiwela yinto engavamanga, emangalisayo njalo.

Omunye wamagqwetha kaSiwela njalo elilunga leAbbameli Human Rights Lawyers uMnu Lucas Nkomo utshele uNtungamili Nkomo weStudio 7 ukuthi bazayilanda lincwadi kuSiwela babuyele layo eSupreme Court eHarare kunsukwana ezizayo.

Okuhambelana lalokhu

XS
SM
MD
LG