amalinks wokungena

Breaking News

Iyakhathaza Imali Yokuqhuba Uhlelo Lokuthapha Imibono Kazulu


Isisekelo sombuso esiphakathi kokulotshwa khathesi sibikwa sizakwamukelwa nzima nguzulu ngoba sikhokhelwa ngamabandla afuna ukuthi izifiso zawo zibe yizo nje zodwa eziphakathi kwaso.

Amazwila akhulunywe ngomunye ohlaziya ezombusazwe njalo owake wakhokhela inhlanganiso yabafundi eyeZimbabwe National Students Union uMnumzana Clever Bere.

Kunjanlo nje udaba lwemali lukhanya luqhubeka luhlupha kuhlelo lokuthapha imibono kazulu, ekulotshweni kwesisekelo sombuso esitsha.

Kubikwa sokulokungazwisisani phakathi kwekhomidi yephalamende ebona ngokulotshwa kwesisekelo sombuso iCOPAC labenhlanganiso yeUnited Nations Development Programme-UNDP ephathisa loluhlelo ngemali.

Abe UNDP bathi bebekhangelele ukuthi uhlelo lokuthathwa kwemibono kazulu luzagqitshwa ngemva kwenyanga ezintathu isithi izaphathisa ngemali efika ngolwesihlanu lwayonale iviki.

Kodwa abeCOPAC abakaqedi ukuthapha imibono kazulu njalo bakhangelele ukuqedisa loluhlelo ekupheleni kwenyanga ezayo. AbeUNDP bathi abeCOPAC abasebenzisi imali ngendlela ecacileyo.

Ukungazwisisani lokhu sokwenze abeCOPAC bacele umhlangano wesiphangiphangi leManagement committee. Ikhomidi le igoqela abamabandla omathathu akuhulumende womanyano ababekunkulumo zokukhumisana umlotha, abathi uMnumzana Welshman Ncube, uNkosikazi Priscilla Misihairambwi Mushonga abe MDC Mutambara, oMnumzana Tendai Biti, Elton Mangoma abeMDC Tsvangirai, besokusithi oMnumzana Patrick Chinamasa, Nicholas Goche abe ZANU PF.

Abanye abaku khomidi le ngabagcinisihlalo abathathu beCOPAC. Umhlangano lo ukhangelelwe ukuxazulula udaba lwemali yokuqedisa uhlelo lokulotshwa kwesisekelo sombuso esitsha.

Uhulumende ubikwa ubesevumile ukuphathisa loluhlelo ngemali yokubhadala abasebenzisa imitshina yokuthapha imibono kazulu,amatechcians.

Omunye wabagcinisihlalo beCOPAC uMnumzana Edward Mkhosi uthi laloba uhlelo lokwamukela imibono kazulu lubhekane lendubeko ezimbalwa, abakhangelelanga ukuthi lumiswe.

‚Äč
XS
SM
MD
LG