Abahlala eziqintini ezitshiyeneyo ePlumtree, okugoqela iMadlambudzi, iMangubo, iHingwe lezinye ezikulumango, bakhala ngokusalela muva kwezigaba zabo kunhlelo zentuthuko.
Okubadanisa kakhulu yisimo somgwaqo weBhambadzi Road, osuka edolobheni lePlumtree usiya emngceleni weMaitengwe.
Lanxa uhulumende evule umngcele lo ongena elizweni laseBotswana kuminyaka esanda kwedlula, umgwaqo weBambadzi ulokhu umagodigodi njalo uya utshabalala kungela mizamo yokuwulungisisa.
Njengayo yonke imigwaqo engena kwamanye amazwe, uzulu uthi ngabe umgwaqo lo uyafakwa ithara ulungiswe ube yi High way.
UNtungamili Nkomo oweStudio 7 uxhume isakhamuzi seJutjume, duzane leBambadzi uMnu Difa Dube ohlaba umkhosi ngokusilela kwenhlelo zentuthuko esigabeni sakhe.
