Ibandla le ZANU PF selikhuthaza amalunga alo ukuthi avotele ugwalo lwesisekelo sombuso esitsha ngokhetho lwereferendum, lanxa uhlelo lokuqoqwa kwembono kazulu lungakapheli.
Lokhu kwenzakala uMongameli Robert Mugabe esanda kubika ukuthi kufanele kugqitshwe uhlelo lokuloba kutsha isisekelo sombuso ekuqaleni komnyaka ozayo andubana kwenziwe ukhetho lokudinga umongameli.
Ngakwelinye icele, amacele womabili e MDC athi ngabe amabandla womathathu akuhulumende womanyano acubungula ukuthi angasebenzisa njani imbono kazulu esiqoqiwe ukuxaxela ugwalo lweKariba Draft
Inhlanganiso ebona ngokulotshwa kwesisekelo sombuso eye National Constitutional Assembly, i NCA ithi uhlelo lolu aluqhutshwanga ngemfanelo ngakho abantu kumele bengavoteli ugwalo olutsha ngoba lungatshengisi imbono yabo.
Ukuze sihlaziye udaba lolu, uSithandekile Mhlanga we Studio7 uxoxe lengcwethi ecubungula ezombusazwe, uMnu. Dlela Ncube, yena ogcizelela ukuthi kusobala ukuthi ibandla le ZANU PF lijonge ukuqila ekhethweni.
