Isigaba se Harare Province kubandla le ZANU PF sesicebise ukuthi umuyi obelilunga lepolitburo yalelibandla uMnu. Kantibhai Gordanbhai Patel obhubhe ngoMgqibelo eselatshwa e South Africa aphiwe inhlonipho yokuba liqhawe lesizwe ngoba wancedisa elezimbabwe ukuthi lithole uzibuse.
Umuyi uPatel, yena owazalelwe e India, ubhubhele esibhedela e South Africa lapho abeselatshwa khona ngemva kokuwa emzini wakhe eHarare ngenyanga edluleyo.
Umuyi wangena kubandla le ZAPU ngomnyaka ka 1961, walitshiya ngomnyaka ka 1980 esengena kuZANU PF lapho aphiwa izikhundla ezithile ezigoqela ukuba yisiphathamandla kumakomiti alelibandla, ukuba nguSenator ngomnyaka ka 2005, kanye lokumela iMt. Darwin edale lephalamende ngomnyaka ka1990.
Indodana kamuyi uMnu. Vijay Patel utshele iStudio 7 ukuthi isidumbu sikamuyi sikhangelelwe ukufika elizweni ngolweSibili, njalo sitshiswe ngoLwesithathu njengesiko lesi Hindu.
Ungezelele wathi ibandla le ZANU PF beselitshele imuli yakhe ngesinqumo elifuna ukusithatha njalo umuyi engaphiwa inhlonipho yobuqhawe bazakwabelana umlotha wakhe ukwenzela ukuthi uchithelwe emathuneni eHeroes Acre.
UPatel utshele uSithandekile Mhlanga ukuthi omunye umlotha kamuyi uzachithelwa e India emfuleni we Ganges.