Inhlanganiso yeZimbabwe Peace Project ithi lanxa kube lokwehla kwenani lezehlakalo zodlakela elizweni kunyanga edluleyo nxa kuqathaniswa lenyanga ka Ntulikazi kulokufuthelana okwesabekayo.
Linhlanganiso ithi ukufuthelana okukhona elizweni kungabe kubangelwa yikwembulwa amakhwapha kweziphathamandla zikahulumende okwenziwa yibulembu be Wikileaks lemfa kaMnu. Solomon Mujuru owayengumholi webutho leZimbabwe ofele engozini yomlilo.
UMujuru wayecatshangelwa ukuthi ukhokhela elinye ixuku leZanu PF. Linhlanganiso ithi njalo inkulumo yokhetho olungenziwa ekuqaleni komnyaka ozayo lalo selubangele ukuthi abanye belole amahloka bagaxe izagila.
Unobhala jikelele wenhlanganiso ye, National Association of Non-governmental Organizations, iNANGO, uMnu. Godfrey Phiri utshele iStudio 7 ukuthi ukwehla kwenani lezehlakalo zodlakela akuthembisi ukuthi sekusiba lobubelo ngoba imbangela yazo ilokhu ingaguqunga.