Izifundi ze Gombo Primary School eDzivarasekwa eHarare zimanyene labazali kanye lamalunga enhlanganiso ye Progressive Teachers’ Union of Zimbabwe, iPTUZ, zitshengisele kulesisikolo zisola ukungathembeki kweziphathamandla zalesisikolo, kulandela ukunyamalala kwenkonxa zamanzi ezaphiwa lesisikolo yinhlanganiso ye UNICEF.
Iziphathamandla zakulesisikolo, zibikwa zizivalele emahofisini alesisikolo, abatshengiselayo behlabela njalo bethwele amaphepha alemibhalo esolo izenzo zikamphathisikolo.
Isiphathamandla se PTUZ, uNkosikazi Nokuthula Hlabangana utshele iStudio 7 ukuthi amapholisa ambophile okwesikhatshana, kanye lamanye amalunga enhlanganiso yakhe, kodwa bakhululwa sokungenele igqwetha labo.
Silokhu sikudaba oluphathelene lezemfundo, uhulumende ubikwa eseqedile ukulungisa amaphepha emihloliso ye “O” level eyaphanjaniswayo eMasvingo kumaviki edluleyo, kulandela ukugqekezwa kwesinye isikolo.
Imihloliso le, egoqela eye Geography, Shona le Maths isizalotshwa kungakafiki ikhisimusi.
Lokhu kwenzakala kuleminye imbiko ethi kwesinye isikolo eMakhandeni ko Bulawayo, iphepha lomhloliso we History Paper Two alenelanga, okubangele ukuthi abantwana beme ukubhale kusadingwa amanye amaphepha, baze babhala ilanga selisiyatshona.
UMnu. Thandeko Zinti Mnkandla, omela iGwanda South edale lephalamende, njalo eyingcwethi kwezemfundo, utshele uSithandekile Mhlanga we Studio 7 ukuthi ukusebenza kwenhlanganiso ebona ngezokulotshwa kwemihloliso, eye ZIMSEC, kubuyisela imfundo emuva.