Ele Bhilithani lithi amabandla akuhulumende womanyano kumele agcwalisise iziqondiso sesivumelwano seGlobal Political Agreement njalo ahloniphe ilungelo loluntu lentando kazulu nxa efuna umanyano wamazwe awe Europe owe European Union (EU) wesule izijeziso ezethulelwa iziphathamandla zeZanu PF.
Embikweni owethulwe yisigodlo salo eHarare ngolweSihlanu ele Bhilithani lithe lifuna uhulumende elandele zonke izinqumo leziqondiso zeGPA, eqhube njalo inhlelo ezithuthikisa umbuso okhululekileyo.
Imbiko le iza inkulumo zokulungisisa okuhluphayo phakathi kweZanu PF leMDC zimisiwe ngoba abeZanu PF becele ukuthi bayekhulumisana lenkokheli yebandla labo. Inkulumo lezi ziqale ngolweSithathau kodwa zamiswa ngelanga linye kungela lutho oluphumileyo kuzo. Sezizaqhutshwa mhlaka 8 ngenyanga ezayo, kutsho omela iZanu PF kuzo uMnu Patrick Chinamasa.
I Standing Committee yeMDC ekhokhelwa nguMnumzana Morgan Tsvangirai yona ihlangene ngolweSithathu ihlaziya udaba lokungafezwa kweGPA. Ele Bhilithani lithi lizadinga iziloyiso zeMDC lenhlanganiso ezizimeleyo eZimbabwe lizwe ukuthi ziyasuthiseka na ngokuthi kwesulwe izijeziso.
Kodwa lithi kumele kulungisiswe indaba yeGPA kuqala. Ingcwethi ecubungula ezombusazwe uMnu George Mkhwanazi uthi iMDC ingathi izijeziso lezi zesulwe kumele iEU ilalele inkuthazo yayo.
