Intathelizindaba zeZimbabwe zimanyene lezinye umhlaba wonke jikelele ukunanza ilanga lokukhululeka kwazo ekuqhubeni umsebenzi i World Press Freedom day elinanzwa minyaka yonke mhlaka 3 Nkwenkwezi.
Isiqokoqela salonyaka sithi- FREEDOM OF INFORMATION: THE RIGHT TO KNOW. Ukunanza lelilanga intathelizindaba ezizimeleyo lenhlanganiso ezibona ngokwethulwa kwemibiko zitshengisele edolobheni le Harare zikhalaza ngokuswela inkululeko ekusebenzeni.
Ihlanganiso ezimbalwa ezigoqela iMedia Institute of Southern Africa-MISA, Media Monitoring Project of Zimbabwe-MMPZ, Youth Forum, National Constitutional Assembly lezinye zethule imibiko ephathelane lalelilanga, zivumelana ukuthi intathelizindaba zeZimbabwe azikhululekanga njalo zincindezelwe yimithetho efana le AIPPA lePOSA.
Inhlanganiso yeMISA-Zimbabwe ithi iqoqe imikhosi yokunanza lelilanga ekupheleni kwayonale iviki. UBrenda Moyo weStudio 7 uxhume umgcinisihlalo weMISA uMnumzana Loughty Dube othi uhulumende kumele avule amagagasi emisakazo aphe ithuba kulabo abafuna ukusungula amaphephandaba azimeleyo.
Kunjalo nje inhlanganiso yeZimbabwe Media Commission ithi izaqala ukwamukela incwadi zalabo abafuna ukungena kwezokwethulwa kwemibiko lokubhalisa intathelizindaba.
Umgcinisihlalo wohlangothi lwabasakhulayo kunhlanganiso ye NCA uMnumzana Alois Dzvairo uthi ukungakhululeki kwezokwethulwa kwemibiko kutshengisa ukwehluleka kuka hulumende womanyano.
