EleZimbabwe lithi lilakho ukuphuma kuKimberly Process nxa inhlanganiso le ingaqhubeka isala ukuvumela ukuthengiswa kwamadayimana eMarange.
Imbiko le yethulwe yisigodlo seZimbabwe eNamibia ngoMvulo njalo iza ngemva kokuba iKimberly Process yehluleke ukuvumelana kumaviki amabili edluleyo ukuthi iZimbabwe ivunyezwe kumbe hatshi ukuthengisa amadayimana la.
Isigodlo seZimbabwe eNamibia lesi sethese amazwe afana leBhilithani leMelika umlandu wokuvimba iKimberly Process ukuvumeza iZimbabwe ukuthengisa amadayimana ayo ngoba efuna ukugenqula uMongameli Robert Mugabe embusweni.
Inhlanganiso ezizimeleyo zithi akumelanga iZimbabwe ivunyezwe ukuthengisa amadayimana eMarange ngoba esenjiwa kungalandelwa izimiso zeKimberly Process. Le yinto ephikiswa nguhulumende lesithunywa seKimberly Process eZimbabwe uMnu Abbey Chikane.
Ukuhlaziya udaba lolu uNtungamili Nkomo oweStudio 7 uxhume ingcwethi ecubungula ezombusazwe uMnu Rejoice Ngwenya othi iZimbabwe ingaba yenze iphutha elikhulu kakhulu ingaphuma kuKimberly Process.
