Ukunikwa imvumo kwamankampani amahlanu ukuthi alobe amaphephandaba azimeleyo kwemukelwe ngenjabulo ngabanengi eZimbabwe ngoba besithi uzulu sezathola imbiko etshiyeneyo, kulokuthemba amaphephandaba kahulumende, lamalutshwana abevele ekhona.
Amaphephandaba aphiwe imvumo agoqela ayevele ekhona kodwa avalwa, i The Daily News, le The Worker, kanye lamanye, i Newsday, i Daily Gazzette, le The Mail, njalo i Zimbabwe Media Commission ithi izaqalisa ukuwanika incwadi zokuqalisa umsebenzi kusukela ngolweSihlanu.
UMnu. Raphael Khumalo, isiphathamandla se Alpha Media Holdings, eyiyo ethula amaphephandaba e The Standard le Zimbabwe Independent, njalo asezaba lelinye ele Newsday, utshele uSithandekile Mhlanga we Studio 7 ukuthi sebeqalisile ukuqhatsha izisebenzi zaleliphephandaba njalo lizatholakala ezitaladini ngemva kwamalanga alitshumi.
