Imota zokuthwala izibotshwa zisiwa emthethwandaba lokhu zisilela elizweni njalo uhlangothi olubona ngamajele olwe Zimbabwe Prisons Services lubikwa solukhuthaze uhulumende ukuthi angenele kuloludaba, ngoba phakathi kwemali ye budget yalonyaka eyizigidi ezingamatshumi phose amabili uhlangothi lolu soluthole izigidi ezintathu kuphela, osokubangele ukuthi lwehluleke ukufeza inhlelo ezinengi.
Isiphathamandla saloluhlangothi, uMnumzana Washington Chimboza, ubikwa esithi izibotshwa ziphila ngomusa wenhlanganiso ezizimelyo, ezigoqela eye Prison Fellowship Zimbabwe, eziphathisa ngokudla lokunye.
UChimboza uthi eMarondera bazakhela umthethwandaba wabo wesikhatshana duzane lejele, kodwa ayincedi kakhulu ngoba omahluli labo kumele bedinge izimota zokufinyelela lo umthethwandaba.
Amagwetha atshiyeneyo akhulume leStudio7 athi izibotshwa ezivalelwe endaweni ezigombolozele idolobho lako Bulawayo ziyake ziqhutshwe ngenyawo zisiwa emithethwandaba.
UMnumzana Sindiso Mazibisa, igqwetha elililunga le Zimbabwe Lawyers for Human Rights utshele uSithandekile Mhlanga we Studio 7 ukuthi uhlupho lokuswelakala kwezimota lubhahile ko Bulawayo njalo bayake befike emthethwanda izibotshwa abazimelayo zingekho.