Iziphathamandla ezintathu zenhlanganiso ehlolisisa ngokwethulwa kwembiko, i Media Monitoring Project of Zimbabwe (MMPZ) ezibotshwe kumaviki amabili edluleyo eGwanda zikhululwe ngolweSihlanu ngemva kokuhlawula isibambiso sebail samadola angamatshumi amahlanu.
Abathathu laba, ababalisa uNkosazana Molly Chimhanda, Fadzai December, loMnu Gilbert Mabusa, babotshwe kuviki edluleyo besetheswa icala lokwabela abantu amaphetshana abikwa emumethe imbiko engabangela udlakela.
UMnu. Kossam Ncube, igqwetha elimela abathathu laba utshele uSithandekile Mhlanga weStudio 7 ukuthi bazabuyela njalo emthethwandaba ekuqaleni komnyaka ozayo.
Omunye njalo ofunyenwe engelacala ngumthethwandaba weGweru yisiphathamandla secele le MDC elikhokhelwa nguMnu. Morgan Tsvangirai uMnu. Amos Chibaya, obesetheswa icala lokutshaya omunye wabalwa impi yenkululeko kulelodolobho.
Kusenjalo, icele le MDC elikhokhelwa nguMnu. Arthur Mutambara libikwa likhweze ugwalo lwe appeal emthethwandaba ophezulu ngolweSihlanu, liphikisa isinqumo somthethwandaba waphezulu esethulwe ngolweSine, sokuthi uMnu. Mutambara engaqhubeki ehlala emihlanganweni yenkokheli zikahulumende womanyano, amaPrincipals, ngoba umkhokheli omqotho walelibandla kunguMnu. Welshman Ncube.
