Umhlangano wokucubungula okuphathelane labaphila legcikwane kanye lomkhuhlane wengculaza owe National HIV and Aids Conference ungene kulanga lesibili ngoLwesibili eHarare. Emhlanganweni lo, bekuxoxwa ngendlela abesilisa abangenqabela ngayo ukuthelela abanye leligcikwane.
Lokhu kulandela amazwi kaMongameli Robert Mugabe ngoMvulo, lapho asole iziphathamandla zikahulumende esithi yizo ezithelela abesifazana labantwana igcikwane lengculaza ngokuziphathi kwazo.
UMugabe, okhulume la amazwi evula umhlangano ngokusemthethweni, wengeze wathi kuleziphathamandla zikahulumende ezaziwayo ukuthi zinatha amaphilisa ama ARVs okulwisana legcikwane lengculaza kodwa zibonakala zigijimisana labantwana labesifazana abanengi.
Umgcinisihlalo wenhlanganiso elwela amalungelo abantu abaphila legcikwane lengculaza eye Zimbabwe National Network for People Living with HIV/AIDS uMnu. Sebastian Chinhaire uthe amazwi kaMugabe aliqiniso ngoba labo bayazibonela akutshoyo kusenzakala.
USithandekile Mhlanga we Studio 7 uxoxe loAlderman Charles Mpofu, owayengukhansila edolobheni lako Bulawayo ukuze sizwe imbono yakhe ngaloludaba.