Izisebenzi zekhansili yakoBulawayo eziqale ukukhalala umsebenzi ngoMvulo, zibuyele emsebenzini lamuhla ngemva kokwehluleka ukuvumelana lomqhatshi wazo ngeholo lazo, njalo sezikhweze loludaba kumphathintambo obona ngezisebenzi.
Ukhalala umsebenzi lokhu besekubangele ukuvalwa kwamanye amakilinika ekhansili kulelidolobho njalo bekusesatshelwa ukuthi kungaphambanisa umbukiso weZimbabwe International Trade Fair osaqhubeka koBulawayo.
UMnu. Moses Mahlangu unobhala jikelele we Zimbabwe Urban Council Workers’ Union utshele uthi izisebenzi zithemba ukuthi zizathola imali yazo uhulumende engavumela umthethwandaba ukuthi uthengise impahla yekhansili.
UMnu. Amen Mpofu, umsekeli kamayor wedolobho lakoBulawayo utshele uSithandekile Mhlanga we Studio 7 ukuthi ikhansili yehlulekile ukunika izisebenzi iholo lazo ngenxa yokubhidlika komnotho welizwe lokuvalwa kwamafekithali kulelidolobho.