Izisebenzi zikahulumende ziphe uhulumende insuku ezilitshumi lane kuphela ukuthi azengezelele iholo elithe xaxa, kulandela umhlangano wangolweSibili lapho eziyale ukwamukela ukungezelelwa iholo ngamadola ambalwa.
Izisebenzi lezi zethule umbiko lo emhlanganweni lentathelizindaba eHarare, kodwa azingasatshongo ukuthi kuyini ezizakwenza amalanga alitshumi lane engedlula.
Umphathintambo obona ngogatsha lwezisebenzi zikahulumende uMnumzana Eliphas Mukonoweshuro, ubizele izisebenzi emhlanganweni wesiphange-phange ngolweSithathu ntambama, ukuthi kucutshungulwe loludaba.
UMnu. Sifiso Ndlovu, isiphathamandla se Zimbabwe Teachers’ Association (ZIMTA) obesemhlanganweni yomibili, uchasisele uSithandekile Mhlanga we Studio 7 okwenzakalayo.
Ababalisi bona bathi kabasela dlabuzane lokusebenza ngenxa yokuthi bebethembe ukwengezelelwa iholo kuyonale inyanga. UMnumzana Vusumuzi Mahlangu, isiphathamandla se Progresseive Teachers’ Union of Zimbabwe, PTUZ, utshele uSithandekile Mhlanga we Studio 7 ukuthi ababalisi sebesebenza bemadolonzima.