Izizalwane ze Botswana ezintathu ezibotshwe ngeviki edluleyo zihlawuliswe amadola angamakhulu amathathu ngumantshi we Hwange ngoMvulo ngoba zifunyenwe zilecala lokungena elizweni ngokungekho emthethweni.
Kodwa abathathu laba uKiabetswe Mhigo, uGaetsho Simane, lo Phetego Gaosengwe bafunyanwe bengelacala lokungenisa imibhobho emibili elizweni kanye lokuthwala izikhali lezi bengala maphepha elayisensi.
UMnu. Tawanda Chiurayi, igqwetha elibamelayo, utshele uSithandekile Mhlanga we Studio 7 ukuthi ulungiselela ukuthi amapholisa ebaphe imibhobho yabo emibili kanye lemota abayithathelwayo bengakabuyiselwa kubo kusasa.
Kunjalo nje, Izizalwane zeZimbabwe kweleBotswana zithi ohulumende bamazwe womabili kumele bakhumisane umlotha phezu kodaba lokuvalelwa kwezizalwane zeBotswana ezi. Abanye bayesabela ukuthi uma loludaba lungaphathwanga kakuhle, lulakho ukudala inzondano phakathi kwabantu bamazwe womabili.
