Abaphathintambo ababona ngendaba zaphakathi kwelizwe kwele South Africa le Zimbabwe bakhangelelwe ukuhlangana ngolweSibili eSouth Africa, behlafuna udaba lokulungisa incwadi zezizalwane zeZimbabwe ukuthi zihlale kwele South Africa ngokusemthethweni.
Lokhu kulandela imbiko ethi izizalwane zeZimbabwe ezise South Africa zithwele amagabha avuzayo ngoba isigodlo sabameli beZimbabwe e Cape Town kulelolizwe sazise ukuba kasisazinikezi izithupha kulabo abazifunayo ukuthi bathathe ngazo amapassport ayiwo adingakalayo ukuthi balungisise amaphepha okuhlala kulelo lizwe okusemthethweni.
UMnu.Mlamuli Nkomo, ingcwethi ecubungula ezombusazwe njalo eyingcwethi kwezokungena lokuphuma kwabantu, emazweni utshele uSithandekile Mhlanga we Studio 7 ukuthi eleZimbabwe lidonsela emuva ngoba lilenhloni ngenani elikhulu lezizalwane zalo ezibalekela kwele South Africa ngezizatho ezitshiyeneyo.