Izizalwane zeZimbabwe ezidinga ubuphepheli kwele South Africa ezingemukelanga uhlelo olusanda kugqitshwa lokuthola ama permit okuhlala kulelolizwe ngokusemthethweni, zibikwa zithwele amagabha avuzayo ngoba kumele zihlale zidindisa amaphepha azo okungapheliyo njalo kungelaqiniso lokuthi zizabuthola lobo buphepheli.
UMnu. Diliza Mangoye, isiphathamandla secele le MDC elikhokhelwa nguMnu. Welshman Ncube eSouth Africa utshele iStudio 7 ukuthi ibandla lakhe lizibonele ukuthi kulendwendwe ezinde emahofisini ePretoria lapho okudindiswa khona amaphepha la njalo abanye bacina bekhalala besebebotshwa ngoba betholakale bengelamaphepha aqondileyo.
Lokhu kwenzakala abanye abadinga ubuphepheli sebemangalele uhulumende we South Africa emthethwandaba ngokungavuli amahofisi amanengi okufeza lumsebenzi.
UMnu. Zenzo Nkomo, ingcwethi ecubungula ezombusazwe utshele uSithandekile Mhlanga we Studio 7 ukuthi uhulumende kacacisanga indlela uhlelo lwama permit okufanele isebenze ngayo.