Inengi lezizalwane ze Zimbabwe ezihlala egcekeni enkambeni ye De-Doorns kwele South Africa kulandela udlakela lwenkethabetshabi olwaqhamuka kulelozwe nyakenye zithi lokhu zihlezi manzonzo ngoba zingatholi uncedo, njalo zisesaba ukubuyela lapho ezazihlala khona.
Uhulumende we South Africa wayethembise ukuthi uzahlolisisa udaba lwenkamba le, kodwa kubikwa kungakenziwa okunengi okungakhuthaza abantu ukuthi babuyele lapho ababehlala khona.
UMnu. Douglas Dube, omunye wabahlala kulinkamba, utshele uSithandekile Mhlanga we Studio 7 ukuthi impilo inzima kulindawo ngoba izinto zokusebenzisa zisilela.