Umkhokheli welinye icele leMDC uMnu. Welshman Ncube uthi kufanele umuntu ozakhokhela eleZimbabwe abe ngofundileyo ukwenzela ukuthi enelise ukulungisa okuhluphayo elizweni okugoqela ukubhidlika komnotho kanye lodlakela oluphathelene lezombusazwe.
Eminye imbiko ephume kumaphephandaba ehlukeneyo ithi uNcube ubesola uMnu. Morgan Tsvangirai, okhokhela elinye icele le MDC esithi kasoze enelise ukubusa elungise konke okuhluphayo elizweni ngoba engafundanga okweneleyo njalo engacabangi ngokujulileyo.
Kodwa uMnu. Welshman Ncube ngoMvulo wethule umbiko esithi kazange abethe igama lika Mnu. Tsvangirai njalo ababona engani ubesitsho yena balahlekile.
UMnu, Walter Nsununguli Mbongolwane ingcwethi ecubungula ezombusazwe utshele USithandekile Mhlanga weStudio ukuthi imfundo yekolitshini ayiqakathekanga nxa kuyikuthi umkhokheli welizwe evele ekhaliphile ngokwemvelo.