amalinks wokungena

Breaking News

Kambe Kumele Isithombe Sikamuyi UDr. Joshua Nkomo Sibuyiselwe Njalo Sibukiswe Na?


Uzulu useveze imbono etshiyeneyo ngokuthi isithombe sikamuyi uMnu. Joshua Mqabuko Nkomo owaye ngumkhokheli webandla le ZAPU sibekwe ko Bulawayo le Harare kumbe hatshi, kulandela umbiko osanda kwethulwa yisiphathamandla sebandla le ZANU PF uMnu. Rugare Gumbo ukuthi imuli kamuyi isivumelane lohulumende ngaloludaba.

Isithombe lesi sasibekwe lapho okuhlangana khona u Main Street lo 8th Avenue ko Bulawayo ngoMpandula nyakenye kodwa saphanga sethulwa imuli kaNkomo isikhonone ngokuthi ayaziswanga ngaso kukanti sincinyane kakhulu.

Enye insolo eyavela ebantwini ngalesisithombe yindawo esasibekwe khona eKarigamombe Centre eHarare, lokuthi sabunjwa yinkampani ye North Korea eyafundisa ibutho le Fifth Brigade okuyilo eletheswa umlandu wokubulala abantu ngesikhathi sempi yeGukurahundi ilizwe lisanda kuthola uzibuse.

Abanye abalwa impi yenkululeko ngaphansi kwevuyo leZIPRA bathi bazavimba ukwethulwa kwesithombe lesi ngoba kufanele uhulumende aqale abaphe impahla yabo abathathela yona kungakabekwa isithombe sika muyi owayekhokhela lelibutho, ngoba kuyikumlulaza njalo kuyikudingela ibandla le ZANU PF usekelo.

Akukho okuguqukileyo kulesisithombe ngaphandle kokuthi imuli ka Nkomo ifuna sibekwe phezu kwesamende ephakemeyo, hatshi ephansi kakhulu njengakuqala.

URetired Colonel Lazarus Ray Ncube, isiphathamandla se ZIPRA Veterans Trust utshele uSithandekile Mhlanga we Studio 7 ukuthi isithombe sika Nkomo siyemukeleka kodwa kufanele sibe sikhulu njalo singabekwa lapho esasikhona ngoba kuduzane lomgwaqo okwakubangela ukuthi abantu bengenelisi ukuma besibuke.

XS
SM
MD
LG