Kulandela ukutshengisela kwamalunga edale le senate awecele le MDC elikhokhelwa nguMnu. Morgan Tsvangirai esola ukubakhona kwabosibalukhulu abakhethwa ngumongameli Robert Mugabe kulelidale kungavunyelwananga, inengi lokhu lizibuza ukuthi kambe isivumelwano se Global Political Agreement siyabenza na kumbe hatshi.
Amalunga la atshengisele ngokuhlabela, njalo etshaya amathala kulelidale izolo lakuthange, esola ukubakhona kuka Nkosikazi Sithokozile Mathuthu, usibalukhulu we Matabeleland North, uMnu. David Karimanzira owe Harare, uMnu Faber Chidarikire owe Mashonaland West, kanye lo Mnu. Jaison Machaya we Midlands. Lokhu kubangele ukuthi lelidale limise umsebenzi kuze kube nguMbimbitho ngomnyaka ozayo.
Ukuze sihlaziye loludaba, asilaleleni ingxoxo uSithandekile Mhlanga we Studio 7 ayenze lo Nkosikazi Gladys Dube-Gombami, ongomunye wabo Senator abaphatheke kulokhu kutshengisela, endawonye lengcwethi ecubungula ezombusazwe, uMnu. Admore Tshuma, osaqhuba izifundo zakhe e University of Bristol kwele Bhilithani.