amalinks wokungena

Breaking News

Kambe Umdlalo Wokudinga Umuntu Omubi Uphathisani Isizwe?


Othole isicoco sikaMr. Ugly 2015 uMnumzana Mison Sere

Kuhlelo lwethu esilethulela lona maviki wonke ngoLwesithathu, Liphuma Lendaba Litshona Lendaba liviki sixoxa lengcwethi kwezamasiko, uMnu. Thandeko Zinti Mkandla sihlaziya umdlalo wokudinga umuntu wesilisa onguye othiwa mubi ukwedlula bonke.

Lo sokungumnyaka wesine usenziwa lumdlalo owenzelwa endaweni yokunathela esigodleni se Harare. Lumnyaka onqobileyo nguMnu. Mison Sere onqobe, uMnu. William Masvinu, othole lesi sicoco okweminyaka emithathu ilandelana.

Kodwa lo umnyaka uMasvinu uthe enqotshwa wala wathi yena mubi ukwedlula uSere ongelamazinyo ambalwa. Abasekeli baka Masvinu kunye lonkosikazi wakhe bavuse umsindo besithi uSere muhle kulo Masvinu.

USere uphiwe amadola angamakhulu amahlanu, $500 ngokungqoba kwathi uMasvinu wathola i$100. Bekulabanye abayisithupha abancintisileyo kulumdlalo othethwe ngamaphephandaba lemisakazo yomhlaba jikelele.

UMkandla uthi lumbuthano uyinhlekisa kakhulu kusizwe se Zimbabwe esiphakathi kodubo lokonakala komnotho besekwenziwa umdlalo wabantwana usenziwa ngabadala.

"Esintwini umuntu, ikakhulu nxa engowesilisa akukhangelwa ubuso kumbe ukuma koluthi lumzimba wakhe. Umuntu omubi ngulowana olenhliziyo embi," kutsho uMkandla.

UMkandla uthi umuntu wesilisa engafanelwa yizigqoko, abe lejwabu elibutshelezi kumbe abe njani njani abe lelizwi elihle kodwa nxa inhlizyo yakhe imbi nguye umuntu omubi lowo.

Kutsho uMkandla: "Kodwa akulusisizi ngitsho uluntu ukuthi liyazuza ulutho ngokukhangela inkalakatha zamakhala, ingavula zamazinyo, kuyasisiza ngani khona lokho?"

UMkandla wengezelele esithi amadoda abukanayo ngawayizitabana njalo lokho kungenziwa ngabalemali, abangekho endleleni yenqubela phambili.

"Kodwa vele asikaze sizwe ukuthi indoda iyabekwa laphana kuthiwe liyikhwabithe. Lithi izinqe zayo zinjani, isifuba sayo sinjani, imilomo yayo injani ... akukho ... akulandoda embi ngokubunjwa. Indoda embi ngelenhliziyo elobuthakathi. Lokho kwadalelwa omama ukuthi babe kumbe ngamaluba omhlaba," kutsho uMkandla.

please wait
Embed

No media source currently available

0:00 0:05:21 0:00
Lapho esitholakala khona

XS
SM
MD
LG