Ingcwethi kwezemithetho zithi umkhokheli welinye lamacele eMDC njalo eyinhloko kahulumende uMnu. Morgan Tsvangirai ulakho ukufunyanwa elecala lokweyisa umthethwandaba ngokusola ukuthi uMnu. Munyaradzi Gwisai, umkhokheli wenhlanganiso ye International Socialist Organization labanye bakhe bafunyanwe belecala.
UMnu. Tsvangirai uthe kuyadanisa njalo kuyamangalisa ukuthi umthethwandaba uthi abantu balecala ngenxa yokuthi bebebukele umfanekiso wefilimu kumabonakude otshengisa udaba lomvukela we Egypt owawuvele usuludaba egudwini emhlabeni jikelele.
Umsekeli kaTsvangirai, uNkosazana Thokozani Khuphe laye wethule umbiko esola isigwebo umantshi asethulele uGwisai labanye bakhe, esokuthi basebenzele uzulu, i Community Service, njalo bebhadale imali yefayini.
Kodwa uMnu. Lizwe Jamela, ingcwethi kwezemithetho, utshele uSithandekile Mhlanga weStudio 7 ukuthi ukweyisa umthethwandaba, i ‘Contempt of Court” iya ngamabala asetshenzisiweyo.
Kusenjalo, uMnu. Tsvangirai uhlangene lomunye wakhe weBhilithane uMnu. David Cameron ngolweSithathu khonale eBhilithani, ekuqhubekeni kwemizamo yakhe yokuthuthukisa umnotho welizwe, lokuletha ukuthula kwezombusazwe.