Ugatsha lukahulumende olubona ngezempilakahle lulandule imbiko ephume kuphephandaba le The Standard ngempelansonto ethi kulabantwana abalitshumi lesithupha ababhubhe besemitshineni yama incubator esibhedlela se Parirenyatwa eHarare. Imfa lezi zibikwa zibangelwe yikucitshwa kukagetsi mahlayana ngoba isibhedlela lesi silamagenerator alitshumi lantathu asetshenziswa kungacitshwa ugetsi .
Udokotela Henry Madzorera, umphathintambo wezempilakahle utshele iStudio 7 ukuthi ugatsha lwakhe luzaqoqa ugwalo lokwazisa abantu ngokusemthethweni ngaloludaba.
UMnu. Roderick Fayayo isiphathamandla senhlanganiso ye Bulawayo Progressive Residents Association ehlezi itshengisela isola ukucitshwa kukagetsi mahlayana yinkampani ye ZESA utshele uSithandekile Mhlanga weStudio 7 ukuthi lanxa inhlanganiso yakhe ingakatholi imbiko evelela ezibhedlela zalelidolobho ngokuphathelene lezimfa, kunengi okuswelakalayo kulezizibhedlela.
.
