Ukuxabana okuphakathi kwamalunga ebandla le ZAPU kuvele sobala ngoMgqibelo odluleyo, lapho inkokheli yebandla leli exotshe khona amanye amalunga alo emhlangaweni we Interim National Executive Council e Gweru ngoba ebikwa engafuni ukuthi uMnumzana Dumiso Dabengwa akhokhele lelibandla ngezizatho ezitshiyeneyo.
Omunye wabaxotshwe kulumhlangano, uMnu. Evans Ndebele, utshele iStudio 7 ukuthi inkokheli yalelibandla ayilandelanga umthetho webandla ngendlela ebaxotshe ngayo emhlanganweni, langendlela ikomidi abeyikhokhela edilizwe ngayo. Umgcinisihlalo walelibandla eManicaland, uMnu.Five Geza, laye oxotshwe emhlanganweni ofanayo, ubikwa etshele inkokheli yalelibandla ukuthi ingontando kayiphikiswa njalo kufanele ilalele izikhalazo zabanye ukuze iZAPU kube libandla eliqinileyo.
UMnu. Methuseli Moyo, isikhulumi salelibandla uchasisele uSithandekile Mhlanga we Studio 7 okunengi ngaloludaba.