Amapholisa aphazamise umhlangano wokunanza amalungelo abesifazana ele International Women's Day ngoLwesibili, emzini weLuveve koBulawayo athembisa ukubaxabula wonke muntu ozaphikisana lawo. UNothando Sibanda intathelizindaba yeStudio 7 koBulawayo ubika ukuba abantu bahle bachitheka ngokwesaba ukutshaywa.
Umsekeli wenhloko kahulumende uNkosazana Thokozani Khuphe usola amapholisa ngokuthi ayahlukuluza abantu, ikakhulu abesifazana ngesikhathi ilizwe selilungiselela ukhetho.
UmaKhuphe uthi ihofisi yakhe iqoqa umhlangano omkhulu wokuvikela udlakela othiwa yi “Conference to Mitigate the use of Violence During Elections,” lapho okuzacutshungulwa khona udaba lodlakela njalo kube lelanga elibekelwa ukuhluza udlakela oluqondane labesifazana kuphela.
UMaKhuphe utshele uSithandekile Mhlanga weStudio 7 ukuthi abesifazane eZimbabwe lokhu besalele emuva ekutholeni izikhundla eziphezulu kwezombusazwe njalo labasemaphandleni bathwele amagabha avuzayo