Kubotshwe amalunga enhlanganiso elwela amalungelo oluntu eye Women of Zimbabwe Arize, i WOZA, abe tshengisela esola uchuku lwamapholisa, njalo ecela uMongameli Jacob Zuma we South Africa, kanye lomanyano we SADC ukuthi uzame ukumisa udlakela oluseZimbabwe.
Amanye amalunga enhlanganiso le amane abotshwe ngeSonto akhululwe ngoMvulo. IWOZA ithi imangaliswa yikwengezelelwa kwenani lamapholisa ahlomileyo koBulawayo, njalo aqondanise ukutshengisela kwawo lelanga elizayo elokunanza amalungelo abesifazana, i International Women’s Day.
UNkosazana Magodonga Mahlangu isiphathamandla se WOZA, utshele uSithandekile Mhlanga we Studio 7 ukuthi batshengisele ngoMvulo, belihlekana ngoba bekhethe abalezibindi kuphela, abangamisana lamapholisa ahlomileyo.
UMnu. Styx Mhlanga, owaziwa kakhulu ngemidlalo yokuzithokozisa ubikwa ebotshiwe khona ngoMvulo ngemva kokuchothoza inkondlo esithi ibuka amaqhawe akwezinye izigaba zelizwe kungelangitsho lelilodwa iqhawe le Matabeleland. uMhlanga ubikwa ecetshelwe ngumlobi waleyonkondlo emapholiseni.
Kusenjalo, icele le MDC elikhokhelwa nguMnu. Morgan Tsvangirai lithi lihambise udaba lokwalelwa ngamapholisa ukuqhuba imihlangano yama rallies emthethwandaba, ngendlela yokuphikisa lesisinqumo.
Lokhu kulandela ukuvinjwa kwamabandla ezombusazwe ukuthi aqhube imihlangano yama rallies ikakhulu ko Bulawayo.
UMnu. Nhlanhla Dube, isikhulumi secele le MDC elikhokhelwa nguMnu. Welshman Ncube utshele uSithandekile Mhlanga weStudio 7 ukuthi lanxa ibandla lakhe livinjwe ukuqhuba umhlangano walo, ngoMgqibelo ozayo eStanley Square koBulawayo, lizaqhubekela phambili ngoba liyabe lingephulanga umthetho.