Amalunga enhlanganiso ye Mthwakazi Liberation Front abotshiwe lamuhla layizolo ntambama esabela uzulu ama calendars atshengisa indawo inhlanganiso le efuna ilizwe liqunywe ngayo, isizwe sikamthwakazi sizibuse.
Phakathi kwababotshiweyo bekuloMnu. Paul Siwela, owayengumkhokheli we ZAPU , njalo owake wancintisa kukhetho lokudinga umongameli ngomnyaka ka 2000, yena oselilunga lalinhlanganiso. Omunye wababotshiweyo ubikwa etshaywe kakubi ngamapholisa.
UMnu. Max Mnkandla, elinye ilunga lenhlanganiso le utshele uthi amapholisa angene endlini yakhe aqhwanda-qhwanda okungapheliyo.
Igqwetha lababotshiweyo, uMnu. Sindiso Mazibisa, utshele iStudio 7 ukuthi usakhulumisana lamapholisa ukuthi laba ababotshiweyo basiwe emthethwandaba ngokuphangisa.
Lokhu kwenzakala inengi lisithi amapholisa asephongubopha njalo ehlukuluza abantu mahlayana elizweni. EKadoma, icele le MDC elikhokhelwa nguMnu. Morgan Tsvangirai livalelwe ukuqhuba umhlangano e Rimuka Stadium, kwathi elikhokhelwa nguMnu. Welshman Ncube lavalelwa koBulawayo.
UNkosikazi Patricia Tshabalala isiphathamandla se Mthwakazi Liberation Front utshele uSithandekile Mhlanga we Studio 7 ukuthi amapholisa lokhu edinga amanye amalunga enhlanganiso yakhe ukuthi abotshwe.