Umhleli wephephandaba leThe Standard uMnu Nevanji Madanhire lentathelizindaba esebenzela leli phephandaba uPatience Nyangove babotshiwe ngamapholisa ngoLwesithathu.
Ababili laba babotshelwe eHarare besetheswa icala lokuhlambaza esinye isiphathamandla samapholisa uCrispen Makendenge kudaba oluphume ngeSonto kuphephandaba labo, obelumayelana lokubotshwa kukaMnu Jameson Timba.
Amapholisa athi uNyangove loMadanhire beyise uMakendenge ngokuloba ukuthi uyisidlova. Athi baqamba njalo amanga ngokuloba ukuthi ubekhona ngesikhathi uTimba ebotshwa ngeviki edluleyo, esetheswa icala lokweyisa uMongameli Mugabe. Madanhire loNyangove bebelokhe besenkambeni yamapholisa ngoLwesithathu ntambama.
Isiphathamandla senkampani yeAlpha Media Holdings, edinda iphephandaba leStandard uMnu Iden Wetherel usole kakhulu ukubotshwa kwababili laba esithi kuveza sobala ukuthi uhulumende uqhubekela phambili ehlukuluza intathelizindaba.
Amazwi kaWetherel agcizelelwe ngunobhala jikelele wenhlanganiso emela intathelizindaba eye Zimbabwe Union of Journalists (ZUJ), uMnu Foster Dongozi, othi ukhathazeke kakhulu ngokubotshwa kwababili laba.
