Ibandla le MDC elikhokhelwa yinhloko kahulumende uMnumzana Morgan Tsvangirai selimise umsebenzi i Executive yonke yalelibandla kwele Bhilithane, kutsho isikhulumeli salelibandla uMnumzana Nelson Chamisa.
Lokhu kulandela ukutshaphazwa kwemali yebandla okubikwa kwenziwe yiziphathamandla zalelibandla kweleBhilithane. UChamisa uthi ibandla lakhe lizaxotsha bonke abangathembekanga njalo abangalandeli iziqondiso zebandla.
Kodwa esinye isiphathamandla se MDC executive kweleBhilithane esingathandanga ukuqanjwa ngegama sitshele lumsakazo ukuthi akula mali eyatshaphazwayo kodwa yathunyelwa eHarare lapho engasazakalanga ukuthi yafikela ezandleni zikabani. Imali le ibikwa ingaziwa ukuthi yimalini kodwa amanye amaphephandaba athi ingaba zipondo phose inkulungwane ezingamatshumi ayisithupha- 57, 000 pounds.
Isiphathamandla lesi sithi inkokheli yebandla e Harare isivimbe iziphathamandla ezimiswe umsebenzi kwele Bhilithane ukuthi zikhulume lentathelizindaba ngaloludaba. Kubikwa sokukhethwe iziphathamandla zebandla ezizavela eZimbabwe ukuyacubungula loludaba.
Umgcini ngcebo we MDC uMnumzana Roy Bennet utshele abezindaba ukuthi ibandla leli lizachithiza ingatsha zalo zonke ezikwamanye amazwe, ngoba zitshaphaze imali enengi yebandla. Imali le ivela ekuthengisweni kwamakhadi ebandla njalo kumalunga ebandla afuna ukulincedisa ngemali.
UMnumzana Mqondobanzi Magonya yingcwethi ecubungula ezombusazwe ehlala kweleBhilithane. UMagonya utshele uBrenda Moyo weStudio 7 ukuthi kuzakuba nzima ukuthi i MDC yenqabele ukutshaphazwa lokuntshontshwa kwemali kungatsha zalo ezikwamanye amazwe.
