amalinks wokungena

Breaking News

Kufa Abantu Abalitshumi Lanye Engozini Yomgwaqo eMasvingo


Kufe abantu abangamatshumi amabili lanye ngoMvulo ekuseni engozini yomgwaqo ngemva kokuba ibhasi ekade behamba ngayo iphume emgwaqweni yabhewuka esigabeni seNgundu, duzane leMasvingo.

Ibhasi le ibisuka eHarare ilubhekise kweleSouth Africa njalo abasinde kulingozi batshele amapholisa ukuthi umtshayeli ubegijima ngesiqubu esikhulu.

Amapholisa athi ibhasi le ngeyenkampani ethiwa yiMega-Link njalo umtshayeli wayo laye ufele kulingozi. Amapholisa athi abantu abalitshimu lasikhombisa balimele kakubi njalo balaliswe esibhedlela seMasvingo.

Abanye abangamatshumi amane lanhlanu, 45, babikwa bengalimalanga kakhulu. Ingozi le ilandela enye njalo enzakale ngoMvulo odluleyo emgwaqweni weGwanda-Beitbridge lapho okufe khona abantu abalitshumi lambili.

Ngekhefu lephasika kufe abantu phose amatshumi amahlanu engozini zomgwaqo. Lanxa ezinye ingozi zibangelwa yikuphambanisa kwabatshayeli, ezinye zibangelwa yimigwaqo ekusimo esibi kakhulu.

Inengi lisola uhulumende ngokwehluleka ukupha ugatsha olubona ngokulungiswa kwemigwaqo imali.

Isikhulumeli sogatsha lolu, olweZimbabwe National Roads Administration, uMnu Agustine Moyo utshele iStudio 7 ukuthi ugatsha lwakhe ludinga imali engange $2 billion yokulungisisa imigwaqo yonke yelizwe.

Ilunga ledale lephalamende uMnu Albert Mhlanga, yena ohlala kukomidi yeTransport and Infrastructural Development ulaye uthe uhulumende wenza konke okusemandleni akhe ukulungisisa imigwaqo.

XS
SM
MD
LG