NgolweSihlanu mhlaka 18 ngoMpalakazi bekulilanga lokucina lokubhala imihloliso ye ‘O’ le ‘A’ level eka 2009, elizweni jikelele njalo inani labantwana elibhale limihloliso libikwa beliphansi kakhulu nxa liqathaniswa leleminyaka edluleyo.
Ababalisi bathi bawuqhube kuhle umsebenzi wokuhlola ukuqhutshwa kwemihloliso le, lanxa uhulumende engasababhadalanga imali abayikhalazayo. Imihloliso le ivame ukubhalwa izikolo zisavuliwe, kodwa lonyaka uhulumende wengezelele amalanga ngesizatho sokuthi abazali bebhadale imali efunekayo, ngemva kokuba inengi labo lehluleke ukubhadala ngesikhathi esasimisiwe.
UNkosikazi Nokuthula Hlabangana, umsekeli womkhokheli wenhlanganiso elwela amalungelo ababalisi eye Progressive Teachers’ Union of Zimbabwe, PTUZ, utshele uSithandekile Mhlanga we Studio 7 ukuthi inengi lezikolo licine lisiba lohlelo lokunikeza ababalisi idlabuzane olwe ‘invigilation fee’, lapho abazali becelwe ukubhadala ababalisi abakade beqhuba lumsebenzi okuyimadlana okuncane.