UMnu. Morgan Tsvangirai uthi lanxa elwela ilungelo lokwethulwa kwembiko ngendlela ekhululekileyo, intathelizindaba zimthwalise amagabha avuzayo ngokumchothoza, njalo yizo ezimemethekisa ukuzondana lodlakela okuselizweni ngendlela ezethula ngayo imbiko.
Lokhu kuvezwe yisikhulumi sika Mnu. Tsvangirai, ngoLwesihlanu, uMnu. Luke Tamborinyaka yena obephendula umbiko owethulwe yinhlanganiso elwela amalungelo entathelizindaba eye Zimbabwe Union of Journalists ngoLwesibe, ebisola uTsvangirai kanye lomphathintambo wezemigodi uMnu. Obert Mpofu ngokuchothoza intathelizindaba, isithi lokhu kuzibeka engozini.
UMnu. Foster Dongozi, isiphathamandla se ZUJ, utshele uSithandekile Mhlanga weStudio 7 ukuthi sekulezehlakalo ezinengi lapho intathelizindaba esezahlukuluzwa khona ngakho akufanelanga iziphathamandla zikahulumende zivuthele lumlilo ngamazwi eziwakhuluma emphakathini.