Sokuqhamuke ukukhulumisana kubi phakathi kwebandla leZanu PF lecele leMDC elikhokhelwa nguMnu Morgan Tsvangirai phezu kwebhomba elidubuke emzini kaMnu Tendai Biti unobhala jikelele walelo cele, ngoMgqibelo.
IMDC ithi abantu beZanu PF yibo abathiye lelobhomba.
Kodwa iZanu PF iyakulandula lokhu isithi iMDC izithiyele lelibhomba ngenjongo yokuthola usekelo kunkokheli yamazwe angezansi kwezwekazi leAfrica eyeSadc emhlanganweni wokuhlaziya udaba lweZimbabwe ozakwenzelwa kweleSouth Africa ngoMgqibelo.
IZanu PF ithi iMDC isizama ukususa amehlo kazulu kudaba lokubulawa kwepholisa ngeviki edluleyo eGlen View ngabantu abanakanelwa ukubana ngabasekeli bayo yona iMDC.
Iziphathamandla zeZanu PF zithi zizasebenzisa ukubulawa kwalelipholisa ukukhombisa inkokheli yeSadc ukubana iMDC kaTsvangirai libandla lodlakela.
IZanu PF ithi abeMDC laba bazibhombele indlu kaBiti ngoba befuna ukuthola ubufakazi bokufika bekhala ngabo kunkokheli yeSadc emhlanganweni wangoMgqibelo.
Isikhulumeli seMDC kaTsvangirai uMnu Douglas Mwonzora uyakulandula lokhu.
Amabandla womabili sethumele amalunga awo eSouth Africa ukuyakhulumisana labameli bamanye amazwe bedinga usekelo ngaphambilini komhlangano weSadc.
Umkhokheli wamalunga ebandla leZanu PF edale lephalamende uMnu Joram Gumbo utshele iStudio 7 ukuthi ngamanga aluhlaza okukhulunywa yiMDC.
