Kube lokuphikisana kakubi ngolweSibili edaleni lephalamende lapho amalunga eMDC ekhokhelwa nguMnu Morgan Tsvangirai ethese abeZANU PF umlandu wokubuyisela muva uhlelo lokuxolelana elizweni.
Abe MDC bathi ibandla leZANU PF lilokhe liqhubeka libangela udlakela ezigabeni ezinengi zelizwe. AbeZANU PF bazivikele ngokuthi abeMDC yibo abayizigangi abahamba bebangela udlakela.
Ekuhlanganeni kwedale lephalamende namhla amalunga abekhangelele ukukhulumisana ngombiko kamongameli Robert Mugabe awethule kusukwana ezedluleyo kanye lodaba lomthetho we Public Order and Security Act iPOSA.
Kodwa ngenxa yokuphikisana okuqhamuke kulelidale ezinye lezi indaba azisaphathwanga.
UBrenda Moyo weStudio 7 ukhulume lomeli weBulawayo East edale lephalamende, engumsekeli wesikhulumi seMDC kaTsvangirai, uNkosazana Thabitha Khumalo othi bekulokunengi obekumele kukhulunywe ngakho ephalamende ngolweSibili kodwa kwehlula ngoba impikisano ngodaba lodlakela ithethe isikhathi eside.
