Inengi labantu elizweni lamukela ngemizwa ehlukeneyo ukuqakathekiswa kwekhefu leUnity Day elokunanza isivumelwano seUnity Accord esalotshwa ngomnyaka ka1987 kumanyana ibandla le PF ZAPU elalikhokhelwa ngumuyi uMnu. Joshua Mqabuko Nkomo leleZANU PF elikhokhelwa ngumongameli Robert Mugabe.
Amacele womabili eMDC, ibandla le ZAPU, eselikhokhelwa nguMnu. Dumiso Dabengwa kanye lozulu jikelele bathi ilanga leUnity Day alisatsho lutho ngoba izizatho zokubunjwa kwalo zilokhu zingafezwanga, kodwa ibandla leZANU PF lithi isivumelwano lesi lokhu lisinanza njalo amanye amalunga eZAPU elokhu emanyene leZANU PF.
Sokube lemidlalo yenguqu kanye leyokuzithokozisa elizweni kunanzwa lelilanga.
UMnu. Dumisani Nkomo, ingcwethi ecubungula ezombusazwe, utshele uSithandekile Mhlanga oweStudio 7 ukuthi lanxa isivumelwano lesi samisa ukubulawa kwabantu ngesikhathi se Gukurahundi, kunengi okufanele kwenziwe ukuthi abantu bexolelane.
USithandekile Mhlanga weStudio 7 uxoxe ngokujulileyo ngaloludaba loRetired Colonel Ray Ncube, umgcinisihlalo webandla le ZAPU koBulawayo, endawonye loMnu. Jorum Gumbo, isiphathamandla sebandla le ZANU PF.