Amapholisa akoBulawayo abophe amalunga amabili ebandla leZapu ngoMvulo kulandela udlakela oluqhamuke emhlanganweni walelibandla owenzelwe eLuveve ngeSonto.
Kulabanye njalo ababili ababotshiweyo ngeSonto ngemva kokuba betshaye kabuhlungu abasakhulayo ababili abangene emhlanganweni lo batshayelela phansi amatafula besithi umhlangano lo ubungavunyezwanga yiProvince yalelobandla.
Abazi ngokwenakala kulelibandla bathi kukhanya sekulamacele amabili, elinye likhokhelwa ngosaphethe isikhundla sikamgcinisihlalo, uMnumzana Dumiso Dabengwa lelinye icele elikhokhelwa ngowayengusomlomo wedale lephalamende, uMnumzana Cyril Ndebele.
Kodwa isikhulumeli salelibandla, uMnumzana Methuseli Moyo ulandule limbiko kungxoxo ayenze loChris Gande weStudio 7 esithi ababili laba basebenza kuhle kodwa uvume ukuthi bakhona asebekhankasela izikhundla ngendlela etshengisa usiko lwebandla leZanu PF athi ngelobudlwangudlwangu.
