amalinks wokungena

Breaking News

Kuqhamuka Ukufuthelana Phezu Kwesithombe sikaMnu Joshua Nkomo


Imuli kamuyi uMnu Joshua Mqabuko Nkomo siveze ukukhathazeka okukhulu ngemizamo kamanisipala weHarare yokufaka isithombe sikaNkomo duzane lesakhiwo seKarigamombe Center.

Abantu besabelo seMandebeleni labo badla ubhedu ngodaba lolu besithi ukufaka isithombe sikaNkomo duzane leKarigamombe Center yikumeyisa. Embikweni ewethule ngoLwesithathu, imuli kamuyi isole kakhulu leli nyathelo isithi kayifuni isithombe sakhe sifakwe kulindawo.

Abangaziyo ngembali yalindawo bengaba bezibuza ukuthi kuyini okubi ngeKarigamombe Center? Impendulo nansi: Ukuthi Karigamombe ligama elaphiwa uMnu Mugabe libandla lakhe leZanu PF ngesikhathi likhakhasela ukhetho luka 1985 lisithi uzayiwiselwa phansi ngophondo inkomo.

UMqabuko wayekhokhela ibandla le PF Zapu elalisebenzisa inkunzi emnyama njengo phawu lwayo. Ivuyo likaMugabe eleFive brigade lalo lalisithi lingabulala abantu beMandebelni lenkabazwe ngesikhathi sempi yeGukurahundi, liziteme ngokuthi Karigamombe.

Impi le yayijonge ukubulala abasekeli be PF Zapu kodwa yacina sibulalisa abantu nje mahlayana abazinkulungwane ezingamatshumi amabili, 20 000.

AbeZanu PF balile ukuhuluma ngodaba lolu, kodwa abeMDC bathi labo bayalisola inyathelo likamanisipala weHarare. Isikhulumeli seZapu, uMnu Methuseli Moyo uthi okwenziwa ngumanisipala weHarare yikutshengisa ukungamhloniphi uNkomo, okungamazwi agcizelelwe nguMnu Effie Dlela Ncube.

Kusenjalo uBrenda Moyo weStudio 7 uxhume ingcwethi ezicubungula ezombusazwe uMnu Mqondobanzi Magonya loMnu Dumisani Nkomo labo abavumelana labanengi ukuthi isenzo lesi yikweyisa hatshi imuli yakoNkomo kuphela kodwa umthwakazi jikelele.

‚Äč
XS
SM
MD
LG